A.Məmmədli: Azərbaycan hökümətinin H.Desir barədə mövqəyi yanlış və əsassızdır

243

SMDT rəhbəri Anar Məmmədli ATƏT-in Media Azadlığı üzrə nümayəndəsi Harlem Desirin mandatının uzadılmasına qarşı çıxan Azərbaycan hökümətinin mövqeyinin yanlış, əsassız və ölkənin vətəndaşlarının maraqlarına zidd hesab edib. “Cənab Desir son üç il ərzində ATƏT məkanında ifadə azadlığının müdafiəsi, jurnalistlərin və müstəqil medianın qorunması yönündə uğurla çalışıb. Belə bir şəxsin təyinatına etiraz bizim ölkə üçün utancverici hadisədir. Azərbaycan hakimiyyəti bu rüsvayçılığı tez bir zamanda aradan qaldırmalıdır”.

Xatırladaq ki, ötən gün 29 beynəlxalq təşkilat Azərbaycan və Tacikistan nümayəndələrinin ATƏT-in KİV azadlığı üzrə Nümayəndəsi (RFOM) Harlem Dezirin mandatının uzadılmasına blok qoymaq qərarından narahatlıq hissi keçirdiklərini bildirərək birgə bəyanatla çıxış edib.

Bəyanatda deyilir ki, ATƏT-ə üzv olan bütün dövlətlər ifadə azadlığı və KİV azadlığı ilə bağlı öhdəliklərinə riayət etməlidirlər.

Bu bəyanatı yayan təşkilatlar hesab edir ki, buna görə Azərbaycan və Tacikistanın bu addımı ATƏT Nümayəndəsinin əsas nəzarət funksiyasını zəiflətmək cəhdidir.

“ATƏT-in mətbuat azadlığı üzrə nümayəndəsi mandatı ATƏT regionunda KİV-in müdafiəsi və azadlığı işində həddindən artıq əhəmiyyətli institutdur. Xüsusən, biz RFOM-un KİV-in və ifadə azadlığının təşviqi və müdafiəsi ilə bağlı müvafiq məsələlərdə, habelə beynəxalq standartlara və ATƏT qarşısındakı öhdəliklərə uyğun qanunvericiliyin hazırlanmasında ATƏT-in iştirakçısı olan dövlətlərə göstərdiyi köməkliyi yüksək qiymətləndiririk,” sənəddə bildirilir.

“COVİD-19 pandemiyası göstərdi ki, hazırda KİV azadlığının təmin edilməsi hər zaman olduğundan daha vacibdir. Hesab edirik ki, mandatın uzadılması ATƏT iştirakçısı olan dövlətlərin KİV azadlığı təhlükə altında olduğu bir vaxtda ona sadiqliklərini təsdiq etmələri üçün mühüm imkandır.

Buna görə biz Azərbaycanı, Tacikistanı və ATƏT-in iştirakçısı olan bütün dövlətləri öz beynəlxalq öhdəliklərini yerinə yetirməyə və iyulun 19-da cənab Dezirin fəaliyyət müddəti başa çatana qədər mandatının uzadılmasını dəstəkləməyə çağırırıq”, deyə Article 19, Jurnalistləri Müdafiə Komitəsi, Sərhədsiz Reportyorlar, Avropa Mətbuat və KİV Azadlığı Mərkəzi, Avropa Jurnalistlər Federasiyası, Freedom House, Senzura İndeksi, Beynəlxalq Jurnalistlər Federasiyası, Beynəlxalq Mətbuat İnstitutu, ABŞ Pen-Klubu, Beynəlxalq Pen-Klub, Rori Pek Fondu və digər təşkilatların imzaladığı sənəddə qeyd edilir.