SMDT könüllüləri Macarıstan və Serbiyada seçkiləri müşahidə ediblər

Seçkilərin Monitorinqi və Demokratiyanın Tədrisi Mərkəzinin (SMDT) könüllüləri beynəlxalq seçki müşahidə missiyalarının tərkibində Serbiya və Macarıstanda seçkiləri müşahidə ediblər. Könüllülər Aprel ayının 3-də Macarıstanda Parlament seçkilərini və Referendumu, Serbiyada isə erkən Parlament və Prezident seçkilərini qısa və uzun müddətdə müşahidə ediblər. Sözügedən beynəlxalq seçki müşahidə missiyaları SMDT-nin də üzv olduğu ‘Seçkilərin Monitorinqi Təşkilatlarının Avropa Şəbəkəsi’ (ENEMO) təşəbbüsü çərçivəsində tərtib olunub. ENEMO-nun MacarıstanSerbiyada keçirilən seçkilərə dair ilkin rəyləri ilə tanış ola bilərsiz.

Azərbaycanlı müşahidəçilər Macarıstanda Parlament seçkiləri və Referendumu müşahidə ediblər

SMDT Serbiyada beynəlxalq seçki müşahidə missiyasının tərkibində uzunmüddətli müşahidəçilərlə, Macarıstanda isə qısamüddətli müşahidəçilərlə təmsil olunublar. Xatırladaq ki, uzunmüddətli müşahidəçilər namizədlərin qeydiyyatı, təbliğat-təşviqat, seçki günü və seçki sonrası şikayətlərin qeydə alınması dövrləri də daxil olmaqla ümumilikdə seçki prosesinin bütün mərhələlərini müşahidə edirlər. Qısamüddətli müşahidəçilərsə seçki günü statistikaya əsaslanan müşahidə metoduna uyğun olaraq 10-dan çox seçki məntəqəsini ziyarət edərək məlumat toplayır və seçki günü proseslərinin yerli və beynəlxalq qanunvericiliyə uygunluğunu yoxlayırlar.

SMDT könüllüləri Serbiyadakı erkən Parlament və Prezident seçkilərini uzunmüddətdə müşahidə ediblər

SMDT ENEMO şəbəkəsində Azərbaycanı təmsil edən yeganə təşkilat kimi bundan öncə də Ukrayna, Moldova, Gürcüstan və Monteneqro və İsveçdə təşkil olunmuş beynəlxalq seçki müşahidə missiyaları və təhsil səfərlərində aktiv iştirak edib. 18 ölkədən 21 qeyri-hökumət təşkilatını bir araya gətirən ENEMO 2001-ci ildən fəaliyyət göstərir və fəaliyyəti boyunca 7 ölkədə 40-dan çox seçkini müşahidə edib. Beynəlxalq seçki müşahidə missiyaları seçkilər keçirilən ölkədə seçkinin bütün mərhələlərini izləyir və müvafiq olaraq hesabatlar yayırlar. Belə missiyalar seçkinin bütövlüyünün, onun yerli qanunvericilik və beynəlxalq standartlara uyğunluğunu ölçür və beynəlxalq ictimai nəzarət vasitəsi kimi yüksək əhəmiyyətə malik olur.