Seçkilərin Monitorinqi və Demokratiyanın Tədrisi Mərkəzinin
Könüllü Seçki Müşahidəçiliyi üzrə əməkdaşlığa dair
Məlumatı
Seçkilərin Monitorinqi və Demokratiyanın Tədrisi Mərkəzi (SMDT) 2001-ci ildən başlayaraq, Azərbaycanda müstəqil və tərəfsiz seçki müşahidəçiliyinin təşkili üzrə vətəndaşlarla əməkdaşlıq edir.
SMDT könüllü seçki müşahidəçiliyi üzrə indiyədək 15 mindən artıq ölkə vətəndaşına təlim keçərək, onların 16 seçki (bələdiyyə, parlament və prezident) və 3 referendum zamanı seçkilərin monitorinqində iştirakına dəstək verib.
SMDT seçki müşahidəçiliyini Azərbaycanda seçkilərin azad və ədalətli təşkili, vətəndaşların seçki prosesi üzərində ictimai nəzarətin formalaşması baxımından əhəmiyyətli sayır.
SMDT-nin Könüllü Seçki Müşahidəçiləri üçün Davranış Qaydaları sənədini qəbul edən hər bir Azərbaycan vətəndaşı seçkilər dövründə təşkilatla əməkdaşlıq edə bilər.
Seçkilər zamanı SMDT ilə könüllü seçki müşahidəçiliyinin şərtlərinə aşağıdakılar daxildir:
- Seçki komissiyalarında qeydiyyatdan keçmək;
- Onlayn və ya üz-üzə təlimlərdə iştirak etmək;
- Seçki günü Könüllü Seçki Müşahidəçiləri üçün Davranış Qaydalarına əməl etmək;
Seçkilər zamanı SMDT ilə könüllü seçki müşahidəçiliyi üzrə əməkdaşlıq edən vətəndaşlar gələcəkdə aşağıdakılardan faydalana bilər:
- SMDT-nin üzvü olduğu beynəlxalq seçki təşkilatlarının təlim və tədbirlərində bilik və bacarıqlarını artırmaq;
- SMDT-nin üzvü olduğu beynəlxalq seçki təşkilatlarının xarici ölkələrdə təcrübə mübadiləsi və monitorinq missiyalarında iştirak etmək (ingilis dilini bilənlər üçün);
- Könüllük üzrə beynəlxalq layihələrdə iştirak üçün zəmanət məktubu almaq;
- İnsan hüquqları və siyasi institutlarla bağlı beynəlxalq tədris proqrmalarında iştiraka dəstək (ingilis dilini bilənlər üçün);
Əgər Siz gələcəkdə SMDT ilə könüllü seçki müşahidəçiliyi üzrə əməkdaşlıq etmək istəyirsizsə, Müraciət Forması doldurub göndərməklə bizimlə əlaqə yarada bilərsiz.
