Avropa İnsan Hüquqları Məhkəməsinin qərarları və BMT-nin İnsan Hüquqları üzrə Universal Dövrü Qiymətləndirmə üzrə tövsiyələrinin icrası barədə milli səviyyəli ictimai təşəbbüslərin artırılması razılaşdırılıbOktyabrın 14-də Seçkilərin Monitorinqi və Demokratiyanın Tədrisi Mərkəzinin (SMDT) təşəbbüsü ilə Azərbaycanda Avropa İnsan Hüquqları Məhkəməsinin qərarları və BMT-nin İnsan Hüquqları üzrə Universal Dövrü Qiymətləndirmə üzrə tövsiyələrinin icrası barədə milli təşəbbüslərə dair Dəyirmi Masa keçirilib. Tədbirdə insan hüquqlarının müdafiəsi sahəsində fəaliyyət göstərən 10-dan artıq vətəndaş cəmiyyəti qrupu təmsilçisi və hüquq müdafiəçiləri BMT-nin Universal Dövrü Qiymətləndirmə üzrə tövsiyələr və Avropa İnsan Hüquqları Məhkəməsinin qərarlarının Azərbaycanda icra vəziyyəti, bu mexanizmlər çərçivəsində milli səviyyəli ictimai məlumatlandırma və ictimai vəkillik fəaliyyəti üçün əməkdaşlıq imkanları barədə fikir mübadiləsi aparıblar.
Tədbir iştirakçıları Azərbaycan hakimiyyətinin BMT İnsan Hüquqları Şurası və Avropa Şurası Nazirlər Komitəsinin müvafiq tövsiyələrinə laqeyd münasibəti, vətəndaş cəmiyyəti qurumlarının bu tövsiyyələrin icrası yönündə səyləri və vətəndaş cəmiyyəti təşkilatlarının əməkdaşlıq təcrübəsinin artırılmasını qeyd ediblər. Bu məsələlərlə bağlı razılaşdırılıb ki, BMT, Avropa Şurası və Avropa Birliyinin müvafiq strukturları və ölkəmizdəki təmsilçilərinin iştirakı ilə Azərbaycanda insan hüquqlarının müxtəlif sahələri üzrə öhdəliklərin icrası mövzusunda ictimai müzakirələrin keçirilməsi, birgə təqdimat sənədləri və hesabatların hazırlanması yönündə ümumi fəaliyyətin koordinasiyası həyata keçirilsin. Tədbir iştirakçıları birgə və əlaqəli fəaliyyətinin prinsiplərini müzakirə edərək, ilkin olaraq ictimai məlumatlandırma yönündə tədbirlər barədə razılığa gəliblər.
Xatırladaq ki, hazırda Avropa İnsan Hüquqları Məhkəməsinin ümumilikdə 299 qərarı – 55 qərar aparıcı xarakterə malik olmaqla Azərbaycan dövlət qurumları tərəfindən icra olunmamış qalır. Qeyd edək ki, orta statistik göstəricilərə əsasən Azərbaycanda bir qərarın icrası təxminən 7 il çəkir və son 10 ildə siyasi əhəmiyyətli qərarların 97 faizi icra olunmayıb.
2018-ci ildə BMT İnsan Hüquqları Şurasının nəzdində UDQ (UPR) prosesləri zamanı Azərbaycan tərəfi 179 tövsiyəni qəbul edib.
