“Yerli idarəçilikdə vətəndaş iştirakı və yerli icma təşkilatlarının problemləri” mövzusunda ictimai müzakirə keçirilib

Seçkilərin Monitorinqi və Demokratiyanın Tədrisi Mərkəzi (SMDT) Sentyabrın 23-də “Yerli idarəçilikdə vətəndaş iştirakı və yerli icma təşkilatlarının problemləri” mövzusunda ictimai müzakirə keçirib. İctimai müzakirələrdə vətəndaş cəmiyyəti fəalları və Bakı, Qazax, Gəncə, Şəki, Kürdəmir, Beyləqan, Göyçay, İmişli, Mingəçevir və digər bölgələrdən yerli icma təşkilatlarının nümayəndələri iştirak edib.

Açılışı edən SMDT-nin icraçı direktoru Məmməd Məmmədzadə proqramın mövzuları barədə iştirakçıları məlumatlandıraraq bildirib ki, SMDT-nin yaranmasının 20 illiyi münasibəti ilə ölkədə siyasi azadlıqların durumu, seçki sisteminin problemləri, yerli səviyyədə iştirakçılıq və yerli icma qruplarının vəziyyəti və vətəndaş-dövlət münasibətlərə dair mövzularda silsilə tədbirlər keçiriləcək.

SMDT- sədri Anar Məmmədli bildirib ki, ictimai müzakirələrin keçirilməsində əsas məqsəd Azərbaycanda yerli və mərkəzi idarəetmədə vətəndaş iştirakını artırmaq, yerli idarəetmə ilə bağlı vəziyyəti öyrənmək, vətəndaşlar arasında məsələ ilə bağlı maarifləndirmə işi aparmaq, vətəndaş-dövlət institutları arasında əlaqələri inkişaf etdirmək və vətəndaş iştirakının vacibliyini təbliğ etməkdir.

Tədbirdə iştirak edən “Qazax Regional İnkişaf Resursları İctimai Birliyi”nin sədri Məhərrəm Göyüşov regionda olan icma problemlərinə toxunaraq bildiririb ki, hazırda yerli icmaların fəaliyyəti məhəllə komitəsi səviyyəsindədir.  O, yerli icmaların statusu və maliyyələşməsi ilə bağlı qanunvericiliyin təkmilləşdirilməli olduğunu bildirib.

“Gəncə Səsi” şəhər icmasının nümayəndəsi Asəf Əhmədov da qanunvericiliyin təkmilləşdiriləcəyi təqdirdə gələcəkdə icma görüşlərinin və tədbirlərin sayının artacağını, bununlada yerli səviyyəli problemlərin həllinin asanlaşacağını deyib.

Şəki şəhər “Səda” icmasının nümayəndəsi Yusif Lətifov bölgələrdə yerli icma üzvlərinin və vətəndaşların məhkəmə hüquq sisteminə etmadının və müstəqil vəkillərə çatımlılığının aşağı olduğunu bildirib. “Muğan” icmasının nümayəndəsi Samir Məmmədov isə  bölgələrdə vətəndaşların dövlət qurumlarına müraciət etməsi üçün ilkin biliklərə sahib olmadığını və bunun üçündə vətəndaşlar arasında hüquqi maarifləndirmənin əhəmiyyətli olduğunu vurğulayıb.

Jurnalist Azər Əliyev  vətəndaşlar tərəfindən dövlət qurumlarına yönləndirilən şikayətlərə lazımı səviyyədə baxılmadığını və problemlərin həllində dövlət qurumlarının təşəbbüs göstərmədiyini bildirib. O həmçinin yerli icma qruplarının hüquqi yardımla bağlı problemlərinin olduğunu da vurğulayıb. Onun sözlərinə görə nümayəndəlik institutunun ləğvindən sonra bölgələrdə vətəndaşlar və icma üzvlərinin hüquqi mübahisələndirmələrə çıxış imkanı azalıb. Bununlada onların hüquqi xidmətlərdən istifadəsi əhəmiyyətli dərəcədə çətinləşib.

Tədbirdə vətəndaş cəmiyyəti fəallarına və yerli icma təşkilatlarının fəaliyyətinə bürokratik əngəllər yaradıldığı, 2014-cü ildən bu yana QHT-lər haqqında qanunvericilikdə məhdudlaşdırıcı müddəaların hələ də qaldığı, eyni zamanda seçkili özünüidarəetmə orqanlarında təmsilçiliyin olmadığı, siyasi azadlıqlar xüsusəndə toplaşmaq və birləşmək azadlığına məhdudiyyətlərin hələ də qalmasının müstəqil yerli icma təşkilatlarının fəaliyyətinə əngəl olduğu vurğulanıb.

Yekunda SMDT-nin icraçı direktoru Məmməd Məmmədzadə qarşıdakı aylarda icmaların problemləri ilə bağlı keçiriləcək tədbirlərin sayının artacağını və bunun  icmaların yerli özünüidareəetmə orqanlarında iştirakçılığının artmasına müsbət töhvə verəcəyini bildirib.